06:38
😜का बतावव मोर हाल😜
का मय रहेव पहली
अउ का मोला बनाय !
चुहके आमा के फोकला
अउ गोंही मोला बनाय !!
करिया जुलुफ़ म पाटी पार
रेंगँव बिच सड़क म !
मुरछा पा के गिरजाय टुरी
मोर तड़क धड़क म !!
अब चुंदी पाक के पटुवा होगे
चंदुवा बैगा बनाय
का मय रहेव पहली
अउ का मोला बनाय !
चुहके आमा के फोकला
अउ गोंही मोला बनाय !!
पहली परस म भरभर नोट
खाता म पैसा सकलाय !
तोर परभुता म का कहव
ठनठन गोपाल कहलाय!!
महिना के आखिर म
कटोरा मोला धराय
का मय रहेव पहली
अउ का मोला बनाय !
चुहके आमा के फोकला
अउ गोंही मोला बनाय !!
रिंगी चिंगी पहिरौ मय
अलबेला डौका कहलाव !
रिकिम रिकिम के पेंट कुरथा
सेंट ममहाई लगांव !!
अब दू जोड़ी म जिनगी बितहि
उहू मा पीछू कति ह कपाय
का मय रहेव पहली
अउ का मोला बनाय !
चुहके आमा के फोकला
अउ गोंही मोला बनाय !!
दाई ददा तोर कारण छूटगे
छूटगे संगी व्जहुरिया !
संगवारी मन सब गारी देवय
मोहागे टूरा लहरिया !!
ये ओ मोर रोंगोबती गलारा बाई
मजाक म तय काबर रिसाय
जइसना रहेव मय पहली
तेकरो ले सुघ्घर बनाय !
चुहके आमा के गोंही ल
फलदार वृक्ष बनाय !!
